Իրանի արտաքին գործերի նախարար Աբբաս Արաղչին հայտնել է, որ Թեհրանն ու Վաշինգտոնը դեռ չեն սկսել բանակցություններ, այն բանից հետո, երբ ԱՄՆ-ն պատասխան է ստացել նախագահ Դոնալդ Թրամփի նամակին։
«Մենք արտահայտել ենք մեր տեսակետը, ուստի հավատարիմ ենք դիվանագիտությանը և բանակցությունների ուղուն, բայց միայն անուղղակի։ Իհարկե, անհրաժեշտ է ընդունել, որ մինչ օրս ոչ մի բանակցային փուլ չի անցկացվել»,- ասել է նա Իրանի խորհրդարանի լրատվական գործակալությանը տված հարցազրույցում։
Իրանի արտաքին գործերի նախարար Աբբաս Արաղչին հայտարարել է, որ ԱՄՆ-ը «միայն կարող է երազել» Իրանի հետ այնպիսի գործարք կնքելու մասին, ինչպիսին Լիբիայի հետ էր կնքվել 2003 թվականին։ Այդ ժամանակ Լիբիայի առաջնորդ Մուամմար Քադաֆին հրաժարվել էր զանգվածային ոչնչացման զենք ստեղծելու ծրագրերից, և երկրում սկսվել էր ապառազմականացման գործընթաց։
Մարտի 7-ին ԱՄՆ նախագահ Դոնալդ Թրամփը հայտնել էր, որ ուղերձ է հղել Իրանի գերագույն առաջնորդ այաթոլլա Ալի Խամենեիին՝ առաջարկելով բանակցություններ սկսել Իրանի միջուկային ծրագրի շուրջ։
Թեհրանը մերժել է ուղիղ երկխոսությունը Վաշինգտոնի հետ, սակայն պատրաստակամություն է հայտնել շարունակել բանակցությունները միջնորդների մասնակցությամբ։
ԱՄՆ Պետքարտուղարության մամուլի ծառայության ղեկավար Թեմի Բրյուսը, անդրադառնալով իրավիճակին, նշել է, որ եթե Իրանը հրաժարվի բանակցություններից, Վաշինգտոնը կդիմի «գործողությունների այլ տարբերակների»։